معذور الغزل ماكدر يكتب بيت

معذور الغزل ماكدر يكتب بيت
من شافه انصدم واتأذه بالصدمه


حته الابجديه انتفضت بكلمات
وسوت انقلاب الكلمة ع البسمه


ويا كلمه التشوفه تضم نفسهه بساع
تخجل من جماله وتنتهي الكلمه


ضاعت كل اساليب الحروف وياه
لان شايل حسن محد تره يفهمه


اذا يزعل علي اختنك من الاه
ويركض كلبي رأسا يركض يضمه


واذا يضحك يبوك همومي مني بساع
ويتحول ورد كل ساعه اشتمه


واذا يبرد اوج ضلوعي كلهه بنار
وادزهن ويه كلبي ونحترك يمه


يا شعره السرح من ينتشر جن جيش
يكتل ابرياء وكلشي ميهمه


مشكلته اعتقد مو بالعمد يغتال
بس من كد جماله انثبتت التهمه


يا بحر النضر مو عين عنده تكول
تجدح بالسحر وتلون الضلمه


وبخدوده الشمس تشرق واضن تغيب
وبالكوه يتنفس من صغر خشمه


اسكر من ابوسه شفافه خمرة تين
وانام وانتضر يحلم ... واجي بحلمه..


قارورة عطر جسمه ويفيض عطور
وجسمه من العطر ضل دايخ بجسمه


ثلج غطه الصدر منظر جبل خلاب
ومثل حبة كرز مرسومه ع القمه


كسر حته الجمال ودخل بالتاريخ
وموسوعة غينيس خطت ذهب اسمه


لأن هو الوحيد اليحجي وي الاحساس
ولأن هو الوحيد اليشبه النسمه


ولأن هو الوحيد العنده هالة نور
ولأن وحده العليه كلوب مزدحمه


ولأن هو الحسن والرقه والاخلاق
ولأن اجمل صفات بطبعه ملتمه

يسلمج ربي ياضوء الغالية