عتاب بين الحبيبين

هلو شباب بنات شلونكم اليوم جبتلكم
قصيدة تموت هي عتاب بين الحبيبين
يا رب تعجبكم


هو: ليش إجيتي !!!

أوليش كل هاي السنين....إبعيده عن عيني بقيتي....

ليش جبتي إهمومج الكلبي الخلي...أو شلتي خطيتي...

ليش إجيتي !!!!

هي : هو بيده الندى ..من يلهث على أخدود الورد؟

أوهو بيده الكلب ....بيده الكلب يكره ..لو يود ؟

أو هو بيدي من رجف كلبي عليك أو من بعد ؟

آنه لو بيدي أجيتك....من كبرت إبعين جاري....

اليغرك إبماي الخجل لو رد سلام

وآنه لو بيدي إجيتك....من شفت لعيون...

تفتح زيج نفنوفي أوتدور عالحمام

أو والله لو بيدي إجيتك..

يوم جرّبت السهر وإعرفت لذته.......

أو شلت سيفي إعله المنام.......................

هو: آنه عدّيت أربعيني!!!!

هي: أو حلو شيبك ..حلو إبعيني......

هو : آنه عدّيت أربعيني

هي: أو دونك إشتنفع إسنيني!!!!

هو: خايف أصحه أبيوم ...والكه اللهفه بعيونج وهم......

أو حيل مابيّ بعد لا للملامه أو لا ندم....

الزمن ...قاسي إبعشرته أوياي...ما يوم إبتسم....

هي: جنت أنتظرك حبيبي بالأحلام أو بالضنون .....

أو جنت أسأل روحي .......يا روحي..حبيبي من يكون!!!

أو جنت والله الخاطرك ..رغم إنت طيف....

إبحركه اسد الباب وبوجه اليجون....

أو يسألون ؟ إنتي كلبج من حجر؟ إنتي ميته المرأه بيج...أويسألون؟

وركض الطيفك..وحس كل رحمة الله أتلولي وتنام العيون....!!!

هو: مو قليله أهمومج أو ضفتيني هم...

والناس ...جن تطلبج ثار ...أو عدهه حسبه أو عدهه دم....

حتى أهلج ...كلبج إبريشاته منهم ماسلم......

هي: يوم عرفوا بيّ أحبك ...فزعت الدميّ السيوف...

أو جذبت روحي أو كلت مو ذوله أهلي ...عيوني عميه أو ما تشوف

وين؟ طيبة أختي ...وين؟ أو وين كلب أمي العطوف...؟

إمنين ما التفت طعنه ..أو شرد أكض منهه أو شعوف....!!!

أو طحت يمهم جسد خاوي ...

أو روحي غاد إبحضرتك تبجي أو تطوف.........................

هو: بيّ الج نشوة طفل بالعيد..من يحضن هديته..

أو بيّ الج نشوة غريب ..أو جابه جدم البخت بالصدفه أعله بيته

زحتي بجفوفج رماد الروح ..والجمر إشتعل وتوسّديته

ويلي...يالطولج مناره أو بيّ تعب إسنين.....

من كسر ظلّج علي تعبي نسيته....

سحر الله أبسمارج بي تشيه العين.....

ما عندي صبر وأحمل أذيته.........................

بيّ الف عبره أو دمع عيني شحيح.......

أو على برد العافيه إبصدرج...بجيته..............

هي: كلّي هم خايف حبيبي.............؟؟

هو : الخوف بوّل خطوه من عندج....طويته!!!

هي: كلّي متندّم حبيبي!!!!!

هو: نادم إعله الراح من غيرج كضيته