اظـــــــــن حلمــــــــــــان
اظن حلمان شفت الدنيا مو دنيا
واظن حلمان شفت الشمس مفطورة
وانا متاني القطار بديرة ما مش ناس
وانا الوحدي بمحطة وجنهه مهجورة
واحس حافي الجدم وامشي على ارض اشواك
واحس كاع الدرب تلسعني بحرورة
وانا من بعيد شفت الناس فرحانين
وشفت ركبة طفل عالارض منحورة
عجيبة استغربت عن حال هاذي الناس
فجأة ولن سكوت وراحت الصورة
سألت وي روحي شنهو الغير الاحوال
والوادم صفت بالموت مسرورة
اثاري الحال اصبح حال كل الناس
وانعدمت الخوة وضاعت الجورة
ابد لا مو عجيبة اليحصل بهل يوم
وصار اسنين بالقرآن مذكورة
اخو اليذبح اخو من اجل حفنة مال
عرفناها بسور ما نزلت بسورة
وينك يا علي وتشوف هاي الناس
كلها على الارض شو تمشي مسطورة
وصبح نهر العذاب يشك ثياب الكاع
وما جنه نهر والعوز ناعورة
والخوف الدخل بكلوب كل الناس
من ضاع الامان وهدموا سورة
اظن اهواي ارحم لو يموت الطير
ولا يلكه غفل جنحانة مكسورة
بقيت امشي واصيح ابصوت ما مسموع
وشفت رسم الكمر بس ما سطع نورة
وبقيت اومي بدية وحيلي كلة انهار
من شفت الامان يصبح اسطورة
وجن مكسور ظلعي وحيل صليت
وجن بنص جهنم نار صليت
وشفت بالحلم جن مكلوب صليت
اثاري الساعة قامت بس علية