يجي وكت العتب....؟؟؟؟؟

يجي وكت العتب واتعاتب اوياك


واخليهن بديك اذنوبك اوياي


انا الشلتك جمر يحرگ الجفوف


واضل خايف عليك يلوحك الماي


أثر سهم المضه منك أداويه


وأحضرلي مكان لسهمك الجاي


أتلگه الحزن منك وأهم بيك


ويا ملگه اليسرك مثل ملكاي


مثل صبيره أموت من العطش موت


أشرب دمعتي وما أخسرك الماي


وكل روحي صبر واتحمل جروح


اجرح لاتخاف اتحمل اهواي


صبيره وصديقي العطش يفلان


حسبالك أذل من تگطع الماي ؟


هينه شما شفت منك أجازيك


أردها اضعاف الك دگاتك اوياي


شجره اني وأكيد تردلي فد يوم


من أدگك شمس وادور افياي


تاخذ يسرتي ساعتها يفلان


كل زين الالك منطيته يمناي


اتحاسب اوياك الجرح بثنين


أعوف الراح الك بس أخذ الجاي

يسلمو قصيدة روعه تحياتي

يسلمووووووووووووو ياغالي

انشاء الله التميز