تسايلني احبك ليش ؟؟
كل كلمه تسولف عنك وعني
وكل همسه التصل منك تذوبني
يبستان الورد ومحمر الخدين
على بابك غصب رجليه جابني
أكتبلك قوافي وأجمل الأوزان
أصحه وألگه شعري بيك يكتبني
نثر ليلي نجومه بدربك متناني
يهل حسنك بدر يجمعها ويغني
يغار الفجر منك من ضوه خدودك
حتى ألجوري عنك دوم يسألني
أخاف تروح عني ويبقه عمري عليك
بس أسنين تغفه بحســــرتي أوني
وأخاف تروح عني وگلبي طگ بركان
يذوبني ودمعـــــي ينگلب حني
رهني حسنك ومجبور احبك موت
ومدري ليش حسنك دوم يجبرني ؟؟؟
ما مليت حبك حتى بأصعب حال
وأخاف تدور بيه الدنيا وتملني
يلي بعيد عني وبس صدى صوتك
على جنح الهوى مرات يوصلني
انه المكسور خاطر ما تحن يفلان
يا هلبت حنانك مـــره جَبرني
أنه المحروگ گلبي وأحسب الساعات
ولهيبك ماطفه لســــاع حارگني
بعد شط العشگ ما غادر جروفه
وبعدهي الذكرى يمه بيك تجمعني
تســايلني أحبك ليش يا عمري
إذا تعرف جوابه ليش تســـألني
أنت النفس بالريه ونبض شريان
وحبيبي وخاطري وأحساسي وظني
يا أجمل قصيده عيونك الحلوات
وشفافك الميمر بالوفه تغني
أظل طول العمر رمضان صايم بيه
چايمته تهل يوم وتفطــــرني
::::::